Ideya

T'wing nariyan ka sa aking isipan,
O, anong saya, 'pagkat mayro'ng maitatala!

Subalit ilang sandali lamang,
Ika'y tatakas na naman

At hindi na babalikan
Akong masugid na nag-aabang

Sa iyong aking inaalala
Bawat t'wina.

Dahil ako'y umaasa,
Balang araw ika'y maisusulat.

***

Ganoon ka nga ba talaga,
Kusang darating ngunit biglang mawawala?

Sadyang kay hirap
Ng iyong ginagawa -

Isipan ko'y pinarurusahan
Sa bagay na kawalan lamang ang bunga.

Ano ba ang iyong sadya
Sa iyong pagdaan -

Upang ako'y tulungan
O bigyan ng bigong pag-asa

Na ikaw ay mabasa
Sa maraming mga pahina

Hindi mo ba alam
Na sa iyo nakasalalay

Ang aking pag-aakdang
Siya namang aking ikinabubuhay?